Talawan nga Mga Abat

November 2, 2014

Ang mga agta, white lady, nuno sa punso, ug uban pa sama sa pari nga pugot ang ulo, nagsuroysuroy sa kalsada kay ilaha kuno panahon ang Halloween. Nakasugat sila ug lain lain tao.

Tiguwang: Wa ni sila batasan nagsuon-suon man hinuon ug abat, dili na maayo!

Young adult: Kayo na ang best cosplayer!

Teenager: Invited kayo sa Halloween Party namin!

Photo Credit: staypinoy(dot)com

Ug unya naay bata nikuhit sa pari nga pugot ug ulo. Gipakuratan sa pari ang bata. Nipakpak ug nikatawa ang bata kay cute kuno kaayo ang costume!

Natingala ang mga monsters. Niadto sila sa party sa mga teenager kay giimbitar kuno sila. Nalipay ang mga monster kay nakakita sila ug parehas nila. Daghan ang nicongratulate ug nidayeg sa ila costume tungod sa karealistic niini. Nahubog na ang mga teenager ug naklaro nga nagcostume ra sila, dili sila tinuod nga monsters kundi tao. Nagplano ang mga monsters nga manghadlok ngadto sa teenagers. 

Ilaha gihadlok ang mga teenagers.

Apan sa kalit lang...

Zam, zom, kablam, kabog! 

Nablack eye, nabun-og, ug napiang ang mga monsters kay gipaddle ni sa mga teenager kay ilaha i-initiate sa Monsters Gang ang mga tinuod nga monster. Naglumbaanay ug dagan palayo ang mga monsters sa kahadlok.

Sukad niadto, nipromise sila nga dili najud mubalik ug suroysuroy sa kalsada ug manghadlok sa mga tao kung Halloween. By: ArcDel

Ang Siloy sa Sugbo

November 1, 2014

Ang siloy usa ka talagsaon nga langgam. Kini makita lamang sa probinsya sa Sugbo. Dili sa tanan dapit kining maong langgam maglupad-lupad sa kahanginan. Kasagaran anaa sila sa kakahoyan magduwa-duwa ug magtago-tago sa kalibunan. Mauwawon kining maong langgam ug dili kini makita sa syudad, apan kini dali makita sa kabukiran sa Sugbo ilabi na sa mga lungsod sa Argao hangtod sa Alcoy. Giingon nga kining maong langgam makita usab sa lungsod sa Consolacion.

Niingon ang mga katigulangan sa Sugbo nga pirme kini nila madunggan mukanta sayo sa kabuntagon niadtong bata pa sila. Apan nagkadugay, nagkawala kini, ug malipay na kaayo sila nga makadungog pag-usab niining maong langgam nga mukanta. Gibalita sa mga naturalists na ang langgam nga Siloy nagkawala na gayud. Hinay-hinay nga napuo ang populasyon sa maong langgam tungod sa pagpamutol sa kahoy. Naguba ang natural nga pinuy-anan sa mga Siloy mao nga swerte na kaayo kung makakita ka ug mga Siloy karun panahona.

Ang lungsod sa Alcoy mipahigayon ug kasadya nga gitawag ug Siloy Festival aron sa pagpaila sa kaimportante sa maong langgam.

Siloy sa Sugbo

Hinaot nga daghan ang magpakabana sa kalikupan ug mutabang sa pag-amping ug mupalambo sa mga natural nga bahandi sa probinsya sa Sugbo sama sa Siloy. Bisan kinsa kanato adunay abilidad nga makatabang. Bisan lamang sa pagbadlong sa mga bata nga dili tiraduron ang mga kalanggaman, ilabi na ang siloy. By: ArcDel

Ang Chicharon sa Carcar

October 31, 2014

Ang chicharon sa Carcar lami kaayo! Kung ikaw nagpuyo sa habagatan nga bahin sa Sugbo ug muadto sa siyudad, madungog gayud ang mga pulong na "Charon... Charon... Charon.." nga nagagikan sa mga Chicharon Vendors. Ang uban sa mga chicharon vendors mukapyot gayud sa mga bus arun makahalin. Risgo nga negosyo apan maoy ilang panginabuhian. Nakita nako giunsa nila paggukod sa mga bus ug kalit nga mukapyot arun makasakay.

Kada adlaw nako makita ang mga Chicharon vendors ug madungog ang ilahang lain-lain nga tuno sa pagpamaligya. Adunay vendor nga excited, gikapoy, gisapot, ug uban pa, ug gane usahay mag away pa atubangan sa mga pasahero sa bus tungod kay nag-ilog sa customer. 

Testigo ako tungod kay mag ulian ko kada adlaw gikan sa unibersidad sa siyudad padung sa among balay sa probinsya. Usahay magutman sa biyahe so makaingon ko nga maayo gane adunay chicharon nga baligya arun masudlan akoang nagkutoy nga tiyan. Paborito nako ang chicharon sa Carcar kay crunchy kini. Usahay mupalit pud ko arun dalhon nako sa balay kay lami man paresan ug halang nga sili ug aslom nga suka ug unya pun-an ug lemonsito, daog na! sud-an pa.

Chicharon sa Carcar

Ang chicharon sa Carcar, especial kuno. Ambot kung ngano kaya pero kung ikompara kini sa uban nga chicharon, mas lami gayud ang chicharon sa Carcar. Bisan pa ug bata pa ko, wa gihapon ko napul-i niini. Tungod kay tibuok nga karne sa baboy ang gigamit pagbuhat niini. Kahibaw jud ko kay taga-diri man ko sa buhatan dapit. Pero bisan pa, kung imo ihumol ang chicharon sa tubig, makita nimo ang kalainan kung harina lang or karne gayud.

Ako nalang pud ipuno nga ang chicharon lami isagol sa pancit palabok ug uban pa nga klase sa pacit, gane pwede usab ni isagol sa sinabaw nga monggos. By: ArcDel